2 पैहला पाप
प्रमात्में आदमा अतै हव्वा जो असीरवाद दित्ता अतै बलू, "कि तुहै फळा-फुळा अतै पूरी धरती जो अपणी ओलादा सिते भरी देया ।क्जो कि धरती पुर जेह़ड़ा कुछ भी हा तैत पुर तुह़न्दा ही हक्क हा।" ता आदम अपणी लाड़ी हव्वा सौगी बागा मह़न्ज रेहू करदा थू । पर अक्क धैडा कै भ़ुआ कि बागा मन्ज शैतान कीड़े रे रूपा मह़न्ज हव्वा बलै आ। यह शैतान परमात्मे रा बणऊरा अक्क स्वर्गदूत थू जेड़ा कि परमात्मे री जय-जयकार करदा रैन्दा थू। पर इन्नी परमात्मे सिते बेईमानी करी अते आदमा जो अते जेड़ा कुछ भी परमात्मे बणऊरा थू तैत जो बरबाद करना चांहदा थू । ता अक्क धैड़ा इनी हव्वा बलै इच्ची करी पुछु कि, "परमात्मे तुसु जो एस बागा रे फळा खाणे जो ना करूरी हा?" तसे बल्लु, "ना ना, पर बागा रे मन्जा मा जेड़ा रूख हा तटेह़रे फळा जो खाणा ता दूर रेऊ पर हेरने जो भी ना करूरी हा। अते बलुरा हा, 'खालै ता तुसु मरी गाह्णा। शैताने हव्वा जो भकऊ अतै बल्लू, "ना-ना तुसु ना मरना मेरी पक्क मन।परमात्मा अप्पु जाणदा हा कि जैस धैड़े तुसु एह़ फळ खाणा तैस धैड़े तुसु जो अक्ल चली ईणी अते तुसु तसेरे बराबर भुची गाणा।" हव्वा सैताना दी भकाई लगी अते तसे फळा री कनारी हेरू अते सोचु कि एह़ फल़ हेरने जो तूणा बान्का लगू करदा ता खाणे जो कतूणा बांका भुल््ला । तैसे सो फल़ तरोड़ु, अप्पु खऊ अते अपणे लाडे जो भी खोऔऊ। जह़णे तियें सो फल़ खऊ ता तयाँरी हाखरी खुली गई अते तियें हेरू कि असे नंगे हिन। ता तिऐं झट-फट रूखा रै पत्तर त्रोड़ी करी अपणे अंग घटी लै। ता संह़जा रे टैम्मे रोजा साईं परमात्मा बागा मन्ज आ अते आदमा जो हक्क पाई, "आदमा औ आदमा ! आदमे बल्लू, "आऊं तेरे सामणे ना ईच्ची सकदा क्जो कि आऊं नंगा हा। "परमात््मे पुछु "औ आदमा, तिज्जो कुनी दस्सी दित्ता कि तू नंगा हा। "कह़रकी तेंई तस रुखा रा फळ तना खाई लेऊरा जतियो खाणे ताईं मैंई ना करूरी थी? आदमे बल्लू, "एह़ फळ मिन्जो हव्वे खोओऊरा ।"परमात्मे बलू, "एह़ तेईं कै कमाई थैऊ?" हव्वे बल्लु, "एस फल़ा जो खाणे तांई मिन्जो इन्नी कीड़ै भ़कह़ऊरा थू। ऐह़ ह़ुणी करी परमात्मे तिआं त्रीह़नी जो हराप दित्ता। कीड़ै जो बल्लू, "तेरे अते एसा जनानी रे खान्दाना मह़न्ज हमेसा बैर भुल्ला अतै तू हमेसा चिका चटला। तू मणु री खुरी जो डन्गला अतै मणु तेरे मुन्ड़ा पुर होठी सिते मारलै । हव्वा जो बल्लू, "मूं तेरी दोआणु भुणे रा दुख वधाणा अते तू अजा थऊं बाद पीड़ा लेई करी बच्चा जम्ली । "आदमा जो बल्लू तेंई जे अपणी लाड़ी री गप्प मनी करी मेरा हुक्म त्रोड़ूआ ऐत थऊं ऐसा धरती जो हराप लगूआ। तू हमेशा ऐसा धरती मह़न्ज ही कमाला अते इती मह़न्ज ही मरी मुकी गाह़ला। इनी साभे तिंऐं परमात्मे रै हुक्मा जो ना मनी करी पाप करी दिता। ऐत ताईं परमात्मे आदम अतै हव्वा बागा थऊं दड़ाई लाऐ ।
